هجوم السوشيال ميديا على نوارة نجم بسبب خلعها الحجاب

"حادث الهجوم على الناشطة السياسية نوارة نجم لخلعها الحجاب"

في ال 24 من سبتمبر 2018، اعلنت الناشطة السياسية نوارة نجم عن خلعها للحجاب منذ ما يقارب العام مما اثار حفيظة العديد من رواد وسائل التواصل الاجتماعي، ليبدأوا بشنّ هجوم عنيف عليها ووصمها بعدد من الاتهامات كالحديث عن شكلها بعد خلع الحجاب والتشكيك في ذمتها المالية و انتفاعها من الثورة لكسب الاموال. ثم تتطور الامر للحديث عن سلوكيات والدها مما دفعها للرد على كل تلك الاتهامات والتعديات عبر حسابها على تويتر ، لتوضح ان ردة الفعل تلك ستضر بوضع المحجبات في مصر وليس هي فقط وانها تكن كل الاحترام لكل سيدة محجبة او منتقبة بالاضافة الى ضيقها الشديد من التدخل السافر في حياتها الشخصية وجعلها مادة اعلامية .

رد فعل الناشطة نوارة نجم

"ما كنتش حارد بس حاضطر ارد دفاعا عن المحجبات مش عن شخصي.. انا قالعة الحجاب من اكتر من سنة وكنت متوقعة حفلة لما الموضوع يتعرف بس الحقيقة توقعت يتقال كافرة او متآمرة ع الاسلام ما توقعتش ابدا ان يتقال "فلوس التمويل نضفتها وقلعت الحجاب!" هو الحجاب وساخة؟ "

"المعتاد ان لما واحدة ست تطل براسها في المجتمع القذر ده بيتم التعدي عليها باساليب رخيصة لها علاقة بانتهاك شخصها وكل واحدة فينا عارفة كده.. لكن عشان تهاجموا واحدة مختلفين معاها اذيتوا ملايين المحجبات واللي منهم امهاتكم واخواتكم ومراتاتكم وبناتكم لما ربطوا بين الثراء وخلع الحجاب"

"واكتر شيء مثير الشفقة لما ست تبقى منسحقة لفكر طبقي ذكوري متخلف وتبقى هي نفسها محجبة وهي نفسها تقول قبضت تمن خيانة مصر ونضفت وقلعت الحجاب.. يعني انت لابسة الحجاب فقر ولا وقلة حما؟ وازاي انت باصة لنفسك البصة دي ومتعايشة انت شخص حزين وبائس وصعبتي عليا"

"مش حاطلع حد على وضعي المادي لان ده ما يخصش حد زمان كنت باعمل كده وقدمت بلاغ في نفسي لفحص مصادري المالية المعلنة والسرية ووكيل النيابة ضحك.. بس بطلت ادي حد مساحة مش حقه.. كويس انكم فاكريني غنية.. بس مش كويس انكم شايفين الحجاب بتاع الفقرا بس ومش كويس اصلا انكم محتقرين الفقرا"

"اذا انتم متخلفين لدرجة انكم شايفين ان اي ست تتعرض للعمل العام باي صورة من الصور او ما تلتزمش بالنمط المظهري اللي انتوا اقريتوه كنموذج "للعفة" ليه بتحتقروا اللي بتلتزم بتعليماتكم وشايفينها شحاتة ومش نضيفة ومغطية راسها عشان مقملة.. مش انتوا اللي قايلين لها تعمل كده؟"

"يا جماعة انتوا عيانين لدرجة انكم محتقرين امهاتكم نفسها.. واللي عيانين اكتر منكم الستات اللي منصاعة لمعاييركم ومش واعية انها وهي بتردد وراكم قاذوراتكم بتهين نفسها.. وانكم بتحتقروها كونها ست حتى لو التزمت بكل التعليمات زي ما انتم طالبين"

"على اي حال الستات المحجبات تحديدا اللي قالوا "فلوس التمويل نضفتها" لو انتوا عايزين تقلعوا الحجاب وخايفين من المصروف اؤكد لكم ان الحجاب مكلف اكتر.. وفي كل الاحوال اذا مش عايزة تحترمي اي حد مختلف معاك على الاقل ما تحتقريش نفسك"

"وانتوا طبعا ما بتفهموش عبارة "انا حرة" عشان انتم نفسكم مش احرار.. من جواكم انتم مش احرار.. وانا مش مهتمة افهمكم.. مهتمة اعرفكم بس قد ايه انتم مثيرين للشفقة"

"عمر ما حد علق على واحد كان بدقن وحلقها او العكس او كان بجلابية وغيرها او حتى كان متدين والحد. عمر ما حد علق على شكل راجل او جسمه.. حق انتهاك الستات واقتحامهم ده انتوا جايبينه من انهي داهية والستات اللي بتظيط معاكم دول وضعهم ايه؟"

عمرو أديب يعقب على قصة نوارة نجم: الحكم على البشر ليس في يد البشر

ردود افعال وسائل التواصل الاجتماعي

وائل عفان : بالراحة كدة ومن غير لت وعجن #نوارة_نجم بت شيعية يعني تلبس او تقلع الحجاب محصلة بعضها

بنت مصر الحرة : خانت الثورة و حطت ايدها مع العسكر و ساعدتهم على الإنقلاب و لبستنا في السيسي و دلوقتي بتتمتع بتمن الخيانة هتتحاسبوا على خيانتكم يا كلاب

صابرين : بعد الهجوم عليها لما قلعت الحجاب قالوا فلوس التمويل نضفتها... ردت عليهم وقالت : انا قلعتها من سنة وكنت متوقعه يقولوا كافرة يقولوا اَي حاجه بس يقولوا ان فلوس التمويل نضفتها؟؟ ليه هو الحجاب وساخه ؟

كارينات :اللى كاتبة (دى فلوس التمويل)...على فكرة الحجاب مكلف اكثر..وانتى كده بتقولى الحجاب للفقراء اللى كاتبة (نضفت)...ده كده انتى بتتهمى الحجاب ( بالقذارة) انتى بالكلام ده بتسيئى (بغباء) لكل من اختارت ترتدى حجاب

فلاح كفر الهنادوة :انا ما عرفش شكل حضراتكم ايه يللي بتتريقوا علي شكلها و مش عاجبكم مناخيرها و لا شعرها. بس أكيد مادام نازلين عليها تريقة .. أكيد أنكم في غاية الوسامة و سيدات العيلة كلهم غاية في الجمال و الاناقة فياريت تنشروا صوركم و صور سيدات العيلة و بناتها عشان نشوف البضاعة بنفسنا

محمد السيد : هي مش مشكلة حجاب هي مشكلة ازاي اتحولت لراجل كده مش نوارة اصلا بنت او ست؟!

مراجع

ابنة أحمد فؤاد نجم توضح سبب خلعها للحجاب

نوارة نجم بعد خلع الحجاب: «علشان تهاجموا واحدة أذيتوا ملايين المحجبات»

نوارة نجم تكشف سبب خلعها الحجاب

نوارة نجم تخلع حجابها وتهاجم منتقديها

نوارة نجم قلعت الحجاب ....وترد على منتقديها على صفحتها "انا حرة في نفسي والحجاب مش وساخة"

هجوم حاد على نوارة نجم بعد إعلانها خلع الحجاب

مفاجأه .. نواره نجم تتخلى عن الحجاب .. شاهد بالصوره بعد خلعها للحجاب