حرب كبيرة
| |
|---|---|
| تأليف | بنت المصاروة |
| تلحين | بنت المصاروة |
| مؤدية | بنت المصاروة
|
| اللغة | العربية |
| الدولة | مصر
|
حياتي حرب كبيرة... مش لقيالها نهاية
كل يوم بأقول هتخلص... و أبدتدي نفس البداية
قولِّي ليه؟ ليه تحولها لحرب؟
قولِّي ليه؟ ليه تخلي من وجودي ذنب؟
هحكيلك موقف صغير... يبدأ من وأنا فى البيت
في يوم صحيت.. م النوم لقيت... ماما عملالي الفطار... وابتدى نفس الحوار
مفيش نزول... مفيش طلوع... ومن انهاردة مفيش غنا....
مفيش غنا..؟
الغنا ممنوع... والزعل مرفوع
نقول إيه للناس عن بنت كبرت والحجاب مقلوع؟
الحجاب مقلوع؟
يا ماما بس اسمعيني..
حاولي يمكن تفهميني..
دة قراري .. ده اختياري..
مش هينفع تجبريني..
يا بنتى اعقلي..
أنا وأبوكي عنك مسئولين..
ومن النار مرعوبين..
ده غير كلام الناس التانيين..
بأنهي عقل.. وأي دين.. تكونوا عنِّي متحاسبين؟
وانتهى الحوار
و آدي أبسط الحاجات..
مشي في الشارع سكات..
صوتي عورة..
جسمي عورة..
كل حاجة حلمنا بيها لازمها ثورة !
وحياتي حرب كبيرة.. مش لاقيالها نهاية
كل يوم بأقول هتخلص.. وأبتدي نفس البداية
قولِّي ليه؟ ليه تحولها لحرب؟
قولِّي ليه؟ ليه تخلي من وجودي ذنب؟